قصائد مدح أكثر من 42 قصيدة مدح 💙 📜

قصائد مدح أكثر من 1000 قصيدة مدح تشمل ما يلي: قصيدة مدح في رجل كفو،شعر مدح في شخص غالي،قصائد مدح الرجال،شعر مدح قصير، قصائد مدح بنات، قصيدة مدح قويه، قصائد مدح الرسول، ابيات شعر مدح وفخر بدوي.

قصائد مدح أكثر من 42 قصيدة مدح 💙 📜

قصائد مدح

قصيدة مدح 1

ضفيرة ليل
وگذيله وزلف نعناع
وبتوت وتراچي وحجل بيه رنه

وخصر مغزل
عليه يتلولح الرمان
فانوس بحماده ومشتعل چنه

يالمفصل
گمر بربعطعش من فوگ
كل ساعه اعله نجم اسهيل يدنه

من تبزغ
اگول اليوم صبح عيد
وشعل بالصواني اشموع واتهنه

هزيتك
طحت كلك گلب وعثوگ
لميتك شلـــــــــــيل ومابعت منه

يعافيتي
يواهس شوگ
يمفرط عنب واچفوفــــــي لمنه

ماريده
     ولاشمه
الهوى الماجاب منك هيل
اسد ريتـــي واموت ومااشهگنه

مدمن بيك
اسكر من نده اشفافك
واطوطح ابزيجك وادخل الجنه

يچلماتي
يطور الكوت
ذاب ابهور العماره
وابن ذي قار بيك اليــــوم يتغنه

وفر ذبيت
غبشه ونگع ريحانك
تعال اغفه ابحظن ماسمر غرنه

شلك عندي
تعال اخذه بحلات النوم
لبريسم ظلامــــــك دوفلك حنه

قصيدة مدح 2

وينهم ؟ ذبني عليهم ، 
ها يخضر الياس آجيتك ، 
شوغتي تجفّل خيالي . 
تدري عد الله شكبرها ... 
كونك آتذبني آعلى غالي ؟ 
يا بخت عين التطيح آلها آعلى غالي . 
وينهم؟ جم مغربيه .... 
روحي تغرب مايعه بكَذلة شمس ... 
وترد عليّ بوجه خالي . 
صار جم شباج آهزن ، 
جم علك شديت وآترجّه وآبوس ... 
وما كو تالي . 
صار جم هدهد أودي ... 
ومامش ولا ريشه بيها عطورهم ... 
توكَف آكَبالي . 
يا حريج فراكَهم ... 
ومنادس الما يستحون .... 
وشوغتي وضيم الليالي  
آه والتاكل بكَلبي ، 
خايف يكَولون سالي . 
ها يخضر الياس آجيتك . 
عالك شموعك على جفوفي ... 
أخاف ، 
ما آمخليها آعلى موجه ، 
اليوم آشوف الموج عالي ، 
خاف تطفه وما يجون .

قصيدة مدح 3

ذابل
وعطرك يهلهل 
مَطَّر بگلبي الربيع 
ورَگَّص بروحي النهار...

تدري 
من دون الورد
عطرك يسولف؟
يمشي 
ومحمّل فوانيس ومشاعل
عطرك البارد يطرّ الظلمه نار...

وتدري 
كلما مدري شنهي يموت بيَّ
وياخذ الواني الخريف،
تمر ضحكتك 
وي عصافير الشلب واگعد خضار...

مرّه 
لمّيتك قصيده من الجروف
ورهّمتلك
ريشة بيضة
 وريشة گلبي
ونورس  من الورقه طار....

ومرّه 
ضمّيتك حبر 
وي دم رگبتي

وگتلك 
شما تگدر اكتب
مره وجهك، 
مره نسمه...
وخلصت أوراق الشرايين
وعِفتها
محمّله أطفال وسنابل
والگلب جاهل يدوّر،
 بلكي باغنيّة ضحكتك
 يضحك اسمه...

ولالت بدفتر ضلوعي 
شويه گمره 
ونامت بصدري فراشه
وغرگت  ويه انفاسي چلمه....

وطلّعتها
ومن قريت 
أوّل حرف 
من فضّة اسمك
لمعت اعلى شفافي نجمه...
تذكر شگتلك گبل ما ننغلب
ويطش خبرنا؟
نلم حچينا 
ونطفي شبّاچ الوعد...

ولو همّ مرّات أحبّك 
من تگلهم عاشگين
ويضوي چفّك من تسولف
لا تملْ، 
سولف بعد....

تدري مرّه 
انرسم وجهك عالمرايه
وگابليته
وغيّم براسي وصعد...
ومرّه 
طشّيت الورد فوگ الرسايل
والتهيت...
الورد مات
وعطرك البارد گعد! ...

قصيدة مدح 4

لا أدليـهم بگلبك ،،
گـول ضاع

گـلهم أميه وتبخر ما أظن ينلگى بـ گاع

گـلهم أنه بلا أشـراع

حتى أذا گالوا حضن ،،
گـلهم وداع

كـلشي گـلهم ،،

يـاهو يسوه أدموع عينك ..؟!

ويـاهو يستاهل نشد وتگله وينك ..؟!

ليش تعثر ...؟
مره ضم روحك بروحك
مره چذب ناسك و صدگ جروحك
مره سير للفرح من دون نوحك

هي مره وبالحياة تعيش مره

ضيع ،،
خلهم يشتهونك
خلهم يعيشون دنيا بلايه لونك

لا يغرك شوگهم لو طاح مزنه
أ.ولا گلبهم من يلم لـ جفاك حزنه

تالي تعطش ،،
تالي تنمـل

كافي چفك ينعگد بچفوفهم وكت النفاه ،،
ومن يمرك ضيج ينحل
ثاري حضن الناس ليله ،،
شما أيطر الفجر تذبل

ليش تذبل ..؟

ليش حزن الناس موسم ،،
وانته حزنك ماله تالي ..؟

ليش طيفك فاهي گلبه ،،
وطيفهم عرس الليالي ..؟

هواي ليش
و ما حضيت بـ چلمه تشفي

خلصت عمرك أتناطر ،،
يمتى تجفي

مره كابر ،،
گلهم أيغثني المشابگ ،،
للهجر مخلوق چفي

مره ضيع ،،
الدنيا مره

الغربه هم ترهم وطن للـ مالـه ناس
الخمره هم ترهم ولف للـ گلبه كاس

قصيدة مدح 5

گطر من تجي مغيم
يالاسود مزنتك نشوه اريد اطفى واسافر بال . 
واجيك من آخر الدنيا 
نهر مسجون 
لگه بخصرك تضاريسه ولعب شلال . 
وابدي احچيلك شبيه 
ذنب عطشان 
لـنهودك واصابيعي تسولف كل صعب ينگال  .

واطيحن ليل بمتونك 
وانامن نومة الشامه . 
واردن من جديد اصحى
وادردَغ ندى مغبش شاف ولايتك جامه . 

واگول لـروحي هذا اهواچ عيشي الكيف واتوكحي
العشَگ من گلبه فك برزخ 
والخايف يضل مگابل أوهامه . 

وشعوفنك يلنك آخر المشوار 
للعتمه وشفت روحي .
شمل منك يالمنزَل .. ايه وتشبگ جروحي .

ولا املك 
أنه المتسودن بروحك 
والمسودن ، گبل صاحي ، ولگه عيونك ، صبح عاشِگ .

تحن يمتى اشتهاك براسي چم آدم 
لگاك محمل ولاحِگ .
يمتى وليلك شكبره 
تعال اطفيلك الگمره 
ونسولف طوخ 
أحب ليلك مثل رمشك ناگع كلش وغامْگ . 

تعال وبيه خلگ الميل 
اطوف بطولك .. من اتعب اموت عليك متشابْگ .

قصيدة مدح 6

توادعنا ..
وبگى بروحي جذع متروك يتشلبه اعلى طول الغيظ
توادعنا ..
وبگت روجات المعاتب على جروفك تطگ وتفيض
دِرنا اظهورنا والعين بگت بالرگبة تتوسل
تهم نظراتها بمگفاك عسى ماي العتب وشّل
ضعت ودروب المتيهين يطويها الهظم مغزل
ضعت والدنيا ما تندل
ولا غصن الرمش يذبل
ولا المتواعد عيوني ترش رموشها بشوفك
انا المتواعد ظنوني اتلاگه بهيمة طيوفك
وانا البديت غيظي مراضى بـﭼـفوفك ..
وانا الهبّيت ريح بصفنة زلوفك ..
ولو عيني خذاها الشوگ ..
بواﭼـي لديرة المامش ..
رسالة من الجذع للطين ما غير الجذر طارش
ويالـ مهيض بعيني دموع ما ﭼـانت تعرف اتهد ..
وعيوني الجزاها الشوف تروح بواهسك وترد.
يا شوغة زراگ الماي لو حدره جنح للطين ظل يمتد ..
ويا في الشتا .. التف شوگ فوگ الـﭼف شتا المعضد ..
ولك بهداي مو بالوحشة ظلت سنطة الحيطان تتوضى ..
ولك دبحر بلاية شراع ..
كلما غيرة السفّان تكبر بالجرف يحضى ..
رد شمعات يا ليل الصدگ ما شظتّك نجمات..
رد براحتك يالشفت الهوى من يوادع الرايات ..
يالشفت الضوة بديرة الهندس مات ..
ولا لن بيك جيّة تـﭼـذب ظنوني.  
ولا نسيانك  يـﭼودر على عيوني
ولا طاريك يسكت بالنفس مرّة ويسكتني
ولا جاريك ينشف وي جرف دمي ويموتني
وتمر طيوفك التنفض تعب وتراب
وموگد مستحاك اليطفى بعيوني وأشوفك ريح ..
سالوفة رماد اغفى وتفززني ..
اغفى وتفززني ..

قصيدة مدح 7

شگول اعليك؟! 
اگول أنساك؟؟  روحي وياك 
شگول اعليك؟؟
اظل زعلان؟؟  مُر فرگاك
مثل فزّة طفل روحي .. 
تفز لو سمعت بطرواك
ومثل وردة وشحيحة ماي
كتّة مطر تتنخاك ..
واگلك هاك .. شوف اجفاك
شوف اشسوة بيّة اجفاك
وأسمع صدى يناديني
بأسف خان العزيز وياك
تَرف يا گضبة الريحان ..
شفّاي العطر بيها 
تعال عيوني بلياك
ما عاود وسن ليها
تعال اشفافي محتامات
بلثم اشفاك ناغيها ..
تعال ودوس فوگ الروح
منّة وعَلي سويها ..
تعال ادماي الك حمرة ..
ظلام وطلعتك گمرة
تعال وخيّط الدلّال ..
بشَعر ظفيرتك ضبْره
واظل مثل اللي يحفر بير
بـ أبرة يدور الگطرة
واتنطرك واتنخاك
واسمع صدى يناديني ..
بأسف خان العزيز وياك
اگول انساك؟؟  روحي وياك

قصيدة مدح 8

مختنك بيه الدرب
متروس كلي دمع
ولوحدي رديت

طفيت بيه الشمس
من طولي مثل النده
اعله جفوفك تبديت

دكيت باب الزمن
بس منحني طبيت 

وانتهى بوجهي الوكت
وحترك خلگي وذبت 
بس كومتني الالتقي وياك والياريت 

من كتلي خل نفترگ 
اول خسارة العمر 
ماكتلك شحسيت

قصيدة مدح 9

دوس اعلة الورد صار الورد ينداس 
بس عطر ألورد ماتگدر تدوسة 

يصح واحد جريمة اعلة الوجه ينباس أو واحد بالرجل يستاهل تبوسة 

يل عندك شمس لازم يجيك اليل 
ويجبرك غصب تحتاج فانوسة 

لتأمن زمان العلم الطاووس يتبختر وهلس ريش طاووسة 

فك سجن البلابل يا زمان ألخوف ليش بلا ذنب عالصوت محبوسة

 لا تعبد صنم وتشوف بي فرعون 
وتلم الحياية وتنتضر موسى

 ولتخدر ورد من شتلة الكمون 
والشتلة الخبيثة بصفهة مغروسة 

موت بيا زمن مو مشكلة امن تموت
 بس اترك أثر وفعال ملموسة

 دگ عمرة المسيح بخشبة الكتال 
حتى الناس تعرف صوت ناقوسة

 نام بلا خبز خليك ميت جوع 
مافرغت بطن والعين متروسة

قصيدة مدح 10

ودعتها بصوت اليحبون حتى ارضه بزعلها
باست عيوني بمعاضدها الهدية 

كالت امشي ومامشيت رموشها مجلبات بيه

الاهم من هذا كله ماعشت دور الضحية 

ومن وكع بخدودها شويه كحلها
ماتغير شكلي مثل المزهرية

الاشياء الحلوه عدها اغلى من دمها عليه

عافت جفوفي مطر بالريح من ضمت شعرها

حسستني احنه انتهينا
اغنيه للقمصان ودتلي عطرها

والدمع بلل الجام والمطر بلل صورها

ماجنت حاسبها هيجي جنت حسبالي اختصرها

هاي عود اني رحت من يمها راضي

ومن وصلت البيتنه بالليل وحدي 
منين صاير عندي ماضي

كلشي موجود بغرفتي مو هديه ليش متغيره غراضي

المهم صارت بعيدة 

والحنين بدمي كل ماكول يطفه 
تشتعل صورة جديدة

وكلبي مدري منين يبجي 
من السوار من الكلاده من القصيدة

المو حلو يصير بحياتك شي حلو تشوفه الجريدة

هي هاي المشكله بكل النهايات الغريبة
الالبوم اليوم شمعه وباجر اتصور كصيبة
شي طبيعي يصير هيجي غير ماعندي حبيبة

قصيدة مدح 11

الخيمه من تثگل شمسها يزود فيها

وانتَ ذاك.. 

العاندِت چم ليل حتى اتظل گمر
يخله جفنك طيف واتِّرسَه سهر

اللّيش ممدوده اعله طولك
والحزن مَدَت نهر.. 

وواصله الياريت حد الما يجون
وحنظل البرحي ابلهاتك
سد روازين الهوه.. 

وتشرب الصفنه ابسمارك
وانتَ والمامش سوه.. 

وبيدرت حزنك سوالف 
والمشوا تسبگ ضحكتك.. 

انتَ لو ميّت تعيش
ولا عشت ميتَه لهفتك.. 

يا ابنــــادم 
تطفي ليلك
خاف فرّاشة تجي اتموت ابشمعتك

ياحنيــــــن
العزّبت للفرگه عمرك
مدري تشبهمن ابصبرك؟!

وهاي امانه.. 
حتى ماحطلك وصف موش ابمچانه
چنك آنه

قصيدة مدح 12

رايدتني الدنيا عنوان لتعبها 
وانا لو ما هذا الفراگ الضعت طيره بصفگته 
چان هسه شگد احبها 

يا ضريح يفكلي بابه ويطرد إمن جناحي همه ؟
ويا مسيّة تنام بعيوني إمن اغني 
ويا صدگ ياخذني حلمه ؟ 
ويا مراية اتحجب الشيب البروحي من يصد لصباي زلمة ؟

خايفة اكبر وحدي وافطن للنسوني 
وخايفة إمن الچذبتهن بالقصايد ينقرن للصدگوني 
وخايفة الدليتهم عني برسالة 
لگوا حزني ومالگوني 

وخايفة إمن التجاعيد بوجهي تحلى 
وخايفة انسام برخص واشعاري تغلى 
وخايفة اعبر كل صعب وانعاف سهلة 
وخايفة بحظ يا نصيب انگاد للعميان كحلة 
وخايفة بهاي الدواوين الأمَر من گهاويها 
امشي للمو طوگ كذلة 

وخاف أتاني ومايوالمني حبيبي 
وخايفة الحگ شوگي ويرجعني شيبي 
كون اعرف بيا كتر روحي نَزفها 
چا سمعت الگالّي إمن ابعيد طيبي 
وچا عرفت بديرتي شمريود مني 
وماتغربت بنصيبي 

انا حسبالي العشگ حَل وشربته 
وانا من تانيت محبوبي عمر ماردته يرجع 
ردت ارجع اسنيني المچلبة بشبگته 
وهسه عگب الغبشة ال بهاي القصيدة 
انعمللّه الليل لو خلاني نمته.

قصيدة مدح 13

سره مرايات روس اهلج
وعكدت فشل جانت كاضه الكيعان
حلوها الخذو ضلج

وشهر دخان
 لبس حركة محرم وي نده زلوفچ
يبنيتي الرمح هم زين لو مو عالي ما اشوفچ
الخذو تنور حچي الماي شيچيمون

لو كرصت خطيه وياي لو مامش ولا سامع
ما يدرون شحلات الكود من يصير جامع يسحل بجامع
لكونه ثياب تعرك مستحه اعله النوك

ولكونه انصوم خمس اوكات شرياه ونبيع الضوك
ولكونه بكلشي نندل سچه وولايات بس نتيه باول سوك
رقيه الحزن شمرت فوك
رقيه الدنيا موش النه
لون ندري الفقير يعيش ما مذلول ما صرنه
لو ندري الصلاة بالبير تاخذنه على دنيا قصور
جا طحنه بوجه يوسف
ما نرضه الشهيد يموت موت الله
الشهيد الصدك كون يطيح راسه بحضن عين الله
ولا يعثر بجلمت مات
يبنيتي العطش جذاب شربناهم مطر جويات
يبنيتي كظيت سنين اسبك للتراب وياج
وافرغ الكاع من اعثرلج حجايه
وهسه شلون ما تردين لاكيني
واعذري عيوني لو زلفن رمحهم يفتر هوايه

قصيدة مدح 14

عبر زندي السهم ...
و انسيت اصيحن آخ  
ابن آدم ينسه روحه بطيحت اولاده 
هيست حرورت الدم عبرت جفوني
و تبلل حضني ...
حضني الچان اله اوساده 
حرت و اتلفتت
 بس لا هيسني احد 
بس لا شافو اعيوني بچن بهداي 
بس لا شافنه احد گابحانه الماي
مو شيلت رضا
 شلت ابني انا مجبور
بس لا احد ايشوفه چنت خايف 
عرگت بگد عطشنه ...
بحيث اليشوفون
   يتراوالهم چني نهر واگف ...
اختنگ ابني بسهم و ركضت مدري الوين 
رحت رديت اصيحين  
  بويه ...
   بويه  اشلون 
درت صوب الخيم ما ناشفه ولا عين 
التفت اعله المعسكر ذوله هم يبچون
طفل يكسر الخاطر 
هسه شيداوي
بكثر مسح الدمع صارن ارداني عيون 
حرت ...
      وين انطي وجهي محد يگلي
صحت لخواني الحگوني كلاني الشيب
ولكم ابني راح منين ارد لهلي ...

              الشمس هم بطرانه چنها 
          تغبش على المكتول ابنها  

قصيدة مدح 15

كلهن سولفتهن ..لو بعد منهن؟؟
شد عيوني بعصابه واخذني امغمض اندلهن
واندل وين مضمومات واعرف ليش دافنهن

مثل شايب خلص عمره 
وبقى بعود الصبه يدندن
انه كلما الوذ بهالتقيه واضحك ويالناس
دمعاتي علي تفتن ..

شفت قصر الأماره ..ويم عبيد اللّه ..
تلاگـــه المستحيل اهناك والممكن 
الجسد عالگاع ..والراس بطشت ..والجامع يأذن

وصدى ذيج الشتايم من حرب صفين
من فوگ المنابر واذني تسمعهــــن
ومن طعنة علي الفجر بالمحـــراب ..
اجن من السمه معزيـــــــات ..
والنجمات دمن باللطم خدهن..

ودخان المخيم بعد جواه نار
من طبع الجروح التعتك تحزن
لما نسأل التاريـخ ياهو التستحي منهن

يدفن راسه بجفوفه ..
ويگول اهواي بـﭼـني وسجلهن ضاع 
ومضيع دفاترهن ..
عدا ذيج الاجساد الطاهره..
الظلت ثلث تيام ..
ومن ذاك النزف صار التراب بكربلا لين

عدا اجفوف الگمر عباس
ما ذب رايته واثنين اديه ذبهن
عدا سوط الشمر حرك نثايا حسين ..
مدري اشجاوبنه وبالعجل سدهن ..
عدا عيون الفواطم من مشن للشام
عين اعله التراب وعين تربي الجسد والدهن
عدا السجاد فوگ النوگ

و اديه من السلاسل ظل ينز دمهن
ومعرسين والزفهم طلع جناز
ومعرسات والحنه بعدهه بطرف اصابعهن
وگبور النجف والغرّبو بالليل والگصن گصايبهن
ونعوش الأطفال التنحمل مو فوگ سيارات
جن رب السمه ببساط شايلهن
عدا اطلوگ الحوامل بالشته..بالواحد وتسعين
گبل ايامهن والقصف جيبهن ..

كلما نسأل التاريخ ..ياهو التستحي منهن؟
يگول اهواي بـﭼني وبـﭼـه وياي الأنس والجن
هدوم حسين لسه مبللات بدم
وعلى احبال الشمس
بيده النبي شرهـــــــن ..

قصيدة مدح 16

احسّك تنظلم كل ما نبالغ بيك
(احسك تنظلم كل ما نلح بالسيف) 
عرب و نميل وين القوة تتميل
مارسنا التصحر من گلب وياك
وغمضنا وخضارك نابت بمعزل
المهم رغبتنا تشبع مو شرط نرضيك
رغم حد معرفتنا وياك بس تزعل
وعشنا بمجتمع بيه كل ضعيف يطيح
ومن العجز گلنه الزلم تتحمل
جوعان الرفض رايدله خبزة "لا" 
وباب السنابل تأتئ المنجل
ونقصنا انثور مثلك بس صعوبة انثور
حـچينا بموقفك حتى النقص يكمل 
هالخلينه جسمك اقوى من معناك 
جا يمته نحس بـ إنصافنا اتفشل
وبدم الرگاب التارس التاريخ
اجينه لـ سيرتك طفينه كم مشعل
وجعلنا السيف يطغى اعله البياض البيك
واتقبلنا من الـ كلشي يتقبـــــــــل
اكو سبعين محمل للحجاها فلان
بس للـ تنعقل ما ظل ولا محمل
و مو معناها ما لاهث بجفك سيف
بس باقي صفاتك يفترض تنسل!
و الا منطق الخافوا وما لاگوك
أبلغ من الف لو جم الف يُقتل 
اذا حجّمنا دورك بالزند والسيف
معناها الزند من ينگطع تنذل
و حشا يصير انتكالك عالمصيره يطيح
يبو روح الجذب عالمحك تتبدل
الشجاع شلون يثبت مو شلون يصول
ويا محلى الثبات اعله الوفي اليندل
اكثر من جذبنا عليك بيك ايثار
انت اشكد جرح وشكثر ما نخجل
بذاك العطش وادركت الشعوب تريد
واحد يرسلمها اشلون تتغربل
ويتعير اليفزع من تجيسه النار
اذا ظل عالمصالح غيره يتنصل
بس جيب الفهم معنى الرسمته بروح
ويگول انا للعباس مستقبل
عرفنا الماي لكن ما وراء الماي
شنو النفس العظيمة الما رضت تبتل
تگدر تشرب وتاخذ الماي وياك
وفعلك ينحجي وتتخلد وتنجل
لكن ما تريد تصير اي عباس
اليغزل بالإيثار ويكسر المغزل
زَرگ عود القيم وي ما رفضت الماي
وگتلنا تره تذبلون من يذبل
وبنيت وهدمت كل البنوه بالزور
يل بهدم المبادئ ما صرت معول
صمود الواثق يدّني الهدف خطوات
ويخلي الجبيل بعزمه يتوسل
فروسيتك تعززها الفراسة البيك
يا صيهود من خنيابك اتهدل 
يا مرود الما خله العيون عيون
من شاف الحقيقة تريد تتكحل
اخو نعرفك ونجهل خوتك مولاي
ضنيناها هاي البيها نتغزل
يالضحيت مو لحسين لـلـ بحسين
شفت كل اليعجبن بيهن اتمثل
ولو يتفسرن كلهن المضمومات
جا حتى النواصب تسمع المقتل

قصيدة مدح 17

عقلي عيني
وبيه اشوف
الماضي يمكن ما اعرفه
ممكن اتضيع
المعاني من الحروف
لچن استيعابي يفطن
يخلي خط حدر الظروف

والفراغات الخطيرة
والشروحات التروف
الزمن قاموس محچي
والكتب عمره شغوف
تحسه كيفه
ساعة ينبذ بالاسطورة
وساعة يعبد بالخروف
المشكلة براس الانسان
مو بتگطيع الچفوف

ناس تعتبرك ثقافة
ارث تاريخي
من ضمن الرفوف
وناس تعتبرك ديانة
نهج مايعرف الخوف
وناس كل همها دمعها
مومهم سبعين گدام ألوف
اه يا حب الابنادم
اه يا طبعه العطوف
انت اكبر من طفوف
ودمه وتاريخ وسيوف

ما اريد انسج خيالي
وامشي بفلاكي واطوف
انت قصة 
واقعية
انعيشها يوميه عدنه
لچن ما نگدر نشوف

قصيدة مدح 18

شفتك ابـّاب الحِلم ،
ذَبلان يحبيّب 
رِكَـض بيك التَـراب.. 
انـهار ممتده اعلى شِفتَـك
عَطَش مليانه،
وتــراب،
شفـتك ومّدّيت اصابيعي 
اعلى شفتك ،

عِشتـك ،
اتلمّستك ،
ادنـَيتلك ،
صار الحِـلم كلّش ضَبـابي ،
وتيـهت،
تيهـت والغُـربه بـَاب ..
والله يا عَمـّو الحُسـين،
انـت،
حبيبي، 

وانه احبك ،
وارد ابوس شفايـفك،
لاچـن ضَباب ،
هلبـت ..
وصِدفه
وتِشِـع شُمّيسة الله اعلى الضَباب،
وأبـدي اشوفنك!! 
ذَبيـح؟ 
صخـام وجه امي!!
ذَبيـح؟
وصلّه بيك الدَم حَبيبي اعلى التراب!

شفتك اباب الحلم، 
ذبلان يحبـيّب
ذبل بيّه الحـلم
واتعثـرت ،

شفتك ،
اتلمستك 
اتمنـيت،
ماجيت ،
وبچـيت ،
لوحّـدك ،رديت 
ولوَحَدك متـت 

انت دمّي يا حبيبي ،
يا حروف اسمي حَبيبي
اتغربت؟

اتلمّست چفّينك الريحان،
 اطـرى من الحلم 
لاچـن غريبه، 

حتى عينك بالحلم 
نظـرتها يحبيّب غريبة ،

يا عطش گلب الرباب
وياثگـل دربـه،
الذي بغـربه ،

وعطش گلـبه ،
 لحبيبه،

قصيدة مدح 19

انت والموت اتفقتوا
 يموت واحد 
واحد يضل معترض 

اليوم أمس ذبحوك ،
 جا يمتى تموت ؟

شما يجيس السيف نحرك يلكه نحرك بي نبض 
 
حتى ظلك ما سلم من السيوف
الف طعنة 
ومحد يلوح الرفض 

طيفك ابيض
 يصرخ بنوم الضمير 

يشيل من راسه الوسادة 
وينثر بريش الحمام 

اسمك السر ،
 اليرفعه 
 ايطَّيَح لثام النظام

اسمك  من ايمر شبابيج القصور 

الحكومة تخاف  ما تكدر تنام 

شما سحكنا الظلم بسمك ننتفض 

ومن ضمير الحر

 لعصابة حبيب

لراية العباس طفك ما يفض  

لسه نحرك 
يفرض اعله السيف رايه 

وصوتك العالي
 ورمحهم منخفض 

ولسه اشوفك واكف بذاك المكان 

ثابت انت،  وحولك تدور الأرض

قصيدة مدح 20

ردتك ولو چذاب
ردتك تطش بعمري صم عتاب 
ردتك ولوشباچ يملي حياتي تراب
ردتك ولو صبيرة حمرة تفي وجهي من الشمس 
والموت 
والغياب
چذاب ياثعلب عنبنه الترف 
ونعزك ولو چذاب 

دگيت بابي 
وعشبت بابي فرح 
والخشب عطب ذاب
خدي إشتعل 
والروح شبت ورد فلفل
والتراچي ذابن بتيزاب
وصهلت مرجحة الگصايب 
ياحبيبي ياحبيبي 
ومتت مثل الباب 

جم دوب موگلنا الگلب بطل ومنك تاب
چذاب چذاب چذاب
يا ثعلب عنبنه الترف 
ونريدك ولو چذاب.

قصيدة مدح 21

تلاكينه غريب يحب غريب ومالهم ديره!! 

وتواصينه اعله كل نيشان مايدري
منو يشوه تعابيره !

سولفنا سوالف ماحجيناهن مثلهم حيل ..
بريد عيون والساعي سفر غبشه اعله وجه الليل.. 

 تذكر من بجينا هناك جم تابوت.. ؟
تذكر من كلتلك مانريد نموت؟
جا ليش النوارس من درت بينه 
استحت يم الشواطي تفوت؟

علايم بالوجوه.. وصوتهم نيشان
رسايل ماقروهن من كتبنا الطيف
 نگطه بگصة السجان.. 
مدام الله ضماير شوگ ليش يغرّب الانسان!
ليش نعيش ذكرى بذمة النسيان.. 
ليش من العطش ندعيك وانت بسجدتك نهران ؟

شيلم عرشك ..؟ زغيره الناس ما صليتها بخيرك 
إشيلم الكاع  ؟ لونامت نواطيرك ؟

أبتسم خل ترتوي الدنيا
ونرد للغيم كل كطره.. 
إعتلك مثل النجوم الوشمّت جم ليل
من انباكت الگمرة..
اذا دربك متاع يريد
 جاهوه الفقير بيا بچي ايعبره ؟

بسما التسبيح
 طشينه الذمم صوغه اعله جنحانك !
إحترك مثلي اعله حزن الناس سبحانك !

العشك عشكك گبل لانعرف الشبگه
الوطن ضحكه عله شفافك
 گبل لايبتسم جبريل ونصدگه

درت وجهي ودريت بصفنتك حيرة !

وتلاگينه غريب يحب غريب ومالهم ديرة...

قصيدة مدح 22

بعدنا طيور، 
وجناحاتنا يغزلن حرير الفجر ..ثوب أصفر
ولونه يضيع ويطش وي معانينا...
بعدنا طيور
ونْدَوّر قصايد حارة تلمنا،
شوارع دافية تلمنا 
الغصن ما رضه يدفّينا...

برد بالناس..، بوجوه الدكاكين التبيع طيور،
 بالسكته..، باليركضون..، بالرجفة، 
باليضحكون من تشرگ بواچينا... 

وبعدنا طيور
نحرگ للهوا الطاير بخور الگلب،
هلبت يرسم الدخان وجه شراع،
هلبت حضن، 
هلبت نار، 
هلبت سما تلفينا...

بعدنا أبيض من البوسه
الگبل لا دغش يكتلها وتظل رسوم...

بعدنا طيور، 
والدنيا سجن لاحلامنا الخضره
وبعدنا نلبّس الضحكه خجل وهدوم...
شنغنّي! ومراجيح التعب كل عيد
 تطوي هلالنا المكسور

ويغرّب، زواتيته مطر ونجوم.....
عدنا جناح، بس ياهو الـ يتيّهينا!، 
نريد نطير، ونزف على الغيم طيوف...
ردنا گلوب تمسح ريشنا المكسور
وتْطيّر سوالفنا رسايل عايزات حروف....
نتلفّت، وغرگانين
والمگبره انترست ماي
ونفزّع يهلبت بالگبور چفوف....

اجينا من النهر عطّاب
مدري منين هاي النار!
مدري شلون! يلتمّن جمر وجروف...
وذوله الناس اليمرّون والموتى
ولا يدرون بينا شگد لعِب وصياح
ما تدري، شعليها الناس...

ما يدرون دولاب الدمع فرنا
اعلى كل تراب الولايه
وشهگ طين الگلب للراس...

ما يدرون، 
إذا بيبانهم فضّه،
شعليهم بالگصب لو طاح! 
ما يدري النهر من فوگ شمسوي العطش بالياس

قصيدة مدح 23

اخر مرة ازت كتالي للبيت
 أنا نحبيت بعدك وانت حبيت 

اخر مرة اجي وتكلي خيرك
 لكه غيرك ترا الما عندا غيرك

 اخر مرة چلماتك تغثني 
چنت اتباهة بيك وفشلتني 

تفاركنة ونسيتك والعشگ راح
 جا ليش من اشوفك تضحك ارتاح 

اخر مرة اكلك غلطتك هاي
 انا ناسيك بس محتاجك وياي

 ردتك تبقة لاچن الله ما راد
 أكثر مني چنت تحب العناد .

قصيدة مدح 24

الليل ينث گلايد، 
تنگِطع عالخد .. 
وتتناثر جَزِرْ، 
واشبِگ دموعك مدْ .. 

واَصِدْ لعيونك، 
وتثغب عيونك صَدْ .. 
واهِدَّكْ، 
طفل ما ينهدّْ .. 
وأَرِدَّكْ، 
وانته طولك رَدْ .. 

وأمِدْ ثوبك عليّه شراع، 
زلفه ذراع، 
بخيوط الشمس ينشَدْ .. 

تعال انشد عليَّه، 
تجاوبك روحي، 

سِعِدْ، 
تنضح شفافك طور .. 
الليل ينث گلايد، 
وانته صدرك هور

قصيدة مدح 25

يخوف موتنا بصوتك ياشاعرنا..
مشيت ومادرى ولاصاح على حايط لگه أسرارك.
بچيناك وبعدنا نموت  
والليل وهلك والناس 
ترگض جايبه اخبارك...

يغبشه بعين نعسانة  
وقصيدة وسالفه وموال..
ما تنگال..

مكتوب  وطحت بعيونه من الماي 
نسمة وعافية وشلال..
انت جفوف هاي الناس 
وانت الصبح التمر بي شكو جنازة
وتتوكل على الله بطلعة العمال .

انت اشكال ..
حظن الساجيه والماي انت الراح وانت الجاي .
دلتنا ومشينه هواي 
بچينه هواي..

ماشفناك اثاري انگطعت اخبارك 
بعيده بيوتهم والموت دگ بابك  
خذاك وضلت اعله الموگد احچايات محترگه بوجه نارك..
ضلت مهرتك تتناك ياخيال
ياشاعر متت والموت هم اشكال...

قصيدة مدح 26

انه وياك مثل السيف 
مانرتاح اله نضوگ لون الدم 

اله من الجروح انفيض 
وبفي الحزن نلتم 

تدنالي السكوت ارماد مهر يتغاوه ياعشكك على النجمات متيتم 

فيض !!"
بكل وكاحاتك حرير وياي 
ياطعمك لون تفيض 

ضواك بهدنس الغربه واباهل بيك المرايات واتهندم وارد وياك 
واجزي الشيب اجزي الدنيا والنسيان 
اجزي التعب ولغربه زلف خدران 
واكلك يابنادم هاك صوغ من العمر قمصان 

وانته ادم رفيج الكاع رفيج الدم 
انته هواي بعيوني شعر تحلم 
واخاف عليك ياشعبي مثل هاذا الشعب تندم 
اخاف عليك من التاج من الكاع والمنجم 
واخاف هواي حزني يفيض وانته تفيض والفايض صعب يلم 
واخاف تموت ياشعبي واخاف يلوحك الزنجار والمومن ولا يهتم

قصيدة مدح 27

تشتهيني عيونهم دمعة غريبة
واشتهيهم ليل متدثّر بأغاني 
وظرف تنشم مكاتيبه 

يمته ما انبِت گمر بالماي، گطعوني لعطشهم 
ووين ماعدهم عمر ضايع شبابه 
براحتي يمشطون شيبه 

هلي المافهموني هاعزهم بروحي 
بكثر مامنعوني اصيرلّك حبيبه 
بكثر مادوم انت تهواني اعله بُعدي 
الگاع تچويها الشمس چي مو قريبة 

بكثر ما يومية يقروني بمحطة
خاف لا ازهگ واكتبك 
هلي السحگوا هيل عمري بدرب حنظل 
حيل احبنهم واحبك 
هلي الضمّوا عنك سنيني بحرگهم 
مادرو كل نار، گلبك 

وآنه كاغد 
حلمي اصير رماد بچفوف الأريدة
وهذا گلبي 
شما يحبسه الليل غربو 
الصبح يركض وطن مدري لـ ياجريدة
ومدري چم مدري الجزتني ومادريت 
بـ يا هوى الگه النسمة نسمة ؟ 
بيا مسيّة الماي اصدگه 
من اشوف دموعه بيده 
بيا طواري امن الحرب تشبهني گاع 
حتى اعيشلّك شهيدة 
الـ يمتى اموتلّك حلم ؟ 

امس حاچاني الضوه الشارد من سنين النجم 
گالّي اعله الليل چذب التايهين 
وكلشي بي ما ينلزم 
والشمس تنزِف عمرها غروب چي فيّها بضوة اسود ينلچم 
شلون اصدگ الناس وآنه سنيني چذبو ؟
بموته باچر تنثلم 
ويضيع ذِكري 
يا گبر يشهگني باچر للهوى امن ايخنگه عمري ؟ 

آنه زتيت السهر للماله عين 
وگذّلت لونه اويه شَعري 
وانه گدت الصوت للضايع صداها 
وعلمتها شلون بالماتدري، تدري 

وآنه وصيتك عليّه تشيلني من اسمي امن اطيح 
تدگني ع البيبان لو شفت الوكت ناداك ريح 
ووين ماسكتت غناويّك حبيبي 
خوف لليهواك صيح.

قصيدة مدح 28

مَرة سهرنَا سُـوه .. آني و خيالي و حَطب
بـ ليلتهَا چانت برد ..
وَ ألسنة نار الحطب
تتمايل اويَ الهَوا .. لِـ بروحي نفس اللَـهب

والليل مُدمن دمع .. وِ شـما أصب ينتشي
ظليت أصب لَه و شرب ،

وانَه ابتديت الحَــچي
 أُوصف جزيرة بـ بحر
الصبح كلها ندى ...و بالليل كلها ذهب ،

لـ ساحلهَا اجيت بـ بَلم
إمــشَـرگ ايـعَــبر حـزن
و مِجذافَه كلش تعَب ،

مَدت أديهَا جُـرف ...شفت الجزيرة عَجب
ايـحـيط بــيها الوفَــا..
و بين الجبال بـ تَرف ..نايم شعرهَــا گصب
و نخله الجذع يختلـف
ريش الحمامة خشن.!!
عكس النخل مو كَرب..

و وَسط الجزيرة خصر
بـي عـيـن بس مو نَبـع ..
و عنهَـا بـ مسافَــة عنَـب،

گـللي انـت توصـف مَـرة
لااا .. گتله فاهم غـلط..!

گتلك جزيرة بــ بحر ..
الصبح كلها نِدى .. و بالليل كلها ذهب

قصيدة مدح 29

عمرك البوم وصور 
صورة حلوة
 وصورة مرة

الحلوة موقف 
المرة موقف ..  
والمواقف بالنهاية تصير ذكرى

من تگلب هذا الالبوم بضميرك 
موقف تشوفه وتگلبه 
وموقف يذكرك بجرحك 
وجرحك يذكرك بموقف ما تذكره 

وموقف ينزل دمعتك 
تغمض وتعبر الصورة وما تعبره 

ومن يخلّص هذا الألبوم السخيف
 تحاجي روحك 
تشوف اصابيعك وتحسب بيها ناسك 
وين ناسك ؟
 تنصدم  
تبجي،  تضحك ، تنهزم 

ترجع تلم المواقف كلها بيدك 
تحچي وي ايدك ...نسامح ؟... ننتقم ؟

ايدك تگلك عليمن هاي ناسك ناس بس..
بس بالاسم 

تلم ملامح وجهك من الصورة الاولى 
تنفض تراب العمر تنفخها حيل 
تحطها بالصورة الاخيرة وتبتسم 

تكتشف هاي المسافة البينهن جانت مواقف مو صور 

تكتشف هاي المسافة البينهن جانت حلم 

جانت وهم

قصيدة مدح 30

تنده بالجرح للغيض لو للموت
بعدني لحجلك اجفل لو لكشني الصوت

شجابك هّـوٌيِّه يم ناري 
شجابك طين متعافي وانه گلبي نشد مرطوب
شجابك يم حزن گلبي مسيت غروب

اذا ماتطفي البروحي 
عليش اگبالي تچفي الطوس
حتى بجيتك چذاب  فَيِّ دخان
 چملت المتن چويه وحزن مشموس

لم ضحكك وألم تعبي
 شحلاتك من چنت مو عرف  مااتانيك
شحلات الباب من يندگ لعب لو عيد
شحلات البيه وانت بعيد

عود وچان ناگوطك يردني اخضر
تمطر ع الحجر وارجع من امتاناك
مفضوح وبياضي اسمر

تموتني تعب وانطرح دم وتراب 
مشيت وفشله اضل دم اعله راگ الباب

اخذ چفي الوا  لو تدليني
يافانوس سيير خل افك حزني
شكو تكتبني امس واليوم تشطبني

شكبانين ماضاحك للمرايه
حزن ومعلگ بحانه ولا تنفعني الحچايه

ها يچمالت المتعوب يادمعي 
هذا اخر فجر يبچيلي وابچيله
غنه بهداي غنيت اعله كيف الليل

كل شارع اغنيله نشد بهداي
كل موعد اغنيله بچي بهداي 

تعب واتلاوه وي تعبي لوَن مريت
يالمالك شغل بيه
انا استبطيتك ومااجيت 

عمريش الگذلتك ماتفييله
شكثر دردمتك بروحي
شكثر فز گلبي لخيال الحمام اليدنه يم بابي
يالما طوگت نيتك گماري لحزن سردابي

ارد منك وحيد وخايف من اليل
ارد خايف من اخيالي

واحط چفي اعله چف الباب

والشباچ فك صدره لحچي الدخان
ضويات المدينه تنام
وانه وحزني والشباچ يسترنا گفه الحيطان

واسد عيني اعله گد حلمي 
ويفززني الضوه مكسر
ضوه بين الضلوع التكسر الخاطر
اضلوع السگف ماتجبر

غاد من النهر وجهه النخل مترب
بعد ماخاف من يلتم حچي المغرب...

قصيدة مدح 31

چف ليلنا مكحل شمسنه 
ولليوم ماخلصان امسنه
سكتتنا ضلت ترثي حسنه 
وشيعنه ضحكتنا بعرسنا 

محد يعرف اشكاعد يصير 
شجرتنا حركنها الزرازير
دثة  برد نار التنانير 
ويشرب بشر ويسولف البير 

طر المري مطرر حزنه
غريبين بس ذولاك اهلنا 
گيعانه طردت جثثنا
وكلمن رجع نعشه اعله متنه ..

قصيدة مدح 32

زِهــدَت  
بالضــوة 
وبالليــل 
نجمة مـن الصبح تلمـع

رفعــت صـــوت
نصــت صــوت
تتلحن 
محاچـيــها 
وطرب نســمع

عبرت طـيف 
محـد شايــف الوانــه 
طاحـت دمعه 
من خـدهه 
اعله ضحكتهه
وصرت آنــه

عبـرَت دِيــن 
سابگ كـــل نبــي وشــجرة 
عبـرت طيـن
چــان الخـالــق محــضره

عبـرت ياس 
غنــت
 للــوطن والنــاس 
كعـــدت بالـفرح تــجمــع 

رفعـت صـوت
الا تغنــي  
للنجمــات.. ماتــقنـع 

نصت صوت 
تـخجل
 كل معــانـيها 
وخـجـل تِدمـَع

قصيدة مدح 33

-امشي والدنيا مطر والليل نَـاي.. 
يعـزف،
ويرسـم،
ظَـلامج يَـمْ ضـواي ..
..
والهـوى العِـذري رِسَـم وجهج گُمـر ،
وفَـزز بروحي الجگـاير والسَـهر ،

ومدري شنهـي؟
ومدري ويـن؟

نمشي انـه وياچ نِنـدل ابّعضنا وتايهـين،

-امشي والدنيا مطر وچفوفي سيـل،
وليـل ياخذني ويرد بعيوني ليـل،

والهَـوى يگطّـر على ضلوعي حَنـينْ
ومدري ليش
ومدري ويـن ؟

ساعـة وحده من الثـَلج.. 
رَدّتْ شَمـس ذيـچ السِـنين،

-امشي والدنيا مطر ،واعثـر واصيـح
طيحـة الگذلة اعلى بيبـانچ اطيـح، 

امشي خطـواتي حَطب 
واوصـل ورد،
اخذ همومـي.. 
و ارد كارة حطب ،

واشتعل ،
واطـفى ،
واذكرچ ،
واشتعل،
والگلب مشدود خرخاشه بحجـل،
اطفـى؟
يشعلنـي الضمـير،

ورسـمچ الفُـضي 
صَـعد (گـامة) سِما بروحي،
ونـزل (گامة) حريـر،
وچَـمّل سنيني ،
نـجمتين ،
ومَهـب ريح ،
وجِـنح ،
وبراسي ضحكاتـچ وأطيـر،

قصيدة مدح 34

ناعمة او مرحة او طريه شلون اصابيع الزغار 
يامه فرت روس وي فره شعرها 
مسعده وتركص بهيده 
جنها شجره ونسه وينكط ثمرها 

النار بالنفنوف تصعد وحده وحده
 من اصبع البربين للرمان الاحمر 
اطيح روجه شاطي بس تنهض غزاله 
تنطفي وترجع توج بالريح مجمر 

توزع اللذه بطعم مزة عرس 
تكاسر مروره الخمرة بماي اديها 
وتفتر اعله الكوس عبادة شمس 
تبتسم لو صادفتها عيون غركانه بفرحها 
ومن يصادفها حزن تبجي من امس 

وانه وي ماهيست يبدي الخدر لبلاب بالدم ....غازلتها 
ادري اصابع يااامه جاستها وبستها 
ظحكت بوجهي ودرت وجهي وبجيت 
انشدهت وكالت دموعك طشها فوكي 
( الدمع من يطيح فوكج خاف هم يتسمه كيت )

الشعر دمي وتعب عمري ونتي كل ليله اعله بيت 
نجرحت ودنيتها وكالتلي احبك وكمت احس الدنيا طيف 
راودتني والصحو فز بقميصي وجفل جفي من زلفها 
وشاورتها العرب ماعمرها ظيف 
(تسكر وتطوطح الدنيا بكبرها وانه ونتي سيف يتجه اعله سيف )

نلهث ثنيناتنه بس مشكلتنه انه محرب ونتي كيف 
انه بشكم كاس اطيح ونتي بير الخمر ماحط بيج ميله 
حلوة وتركصين المكدر بحزنه
 وتجفي الالوان وتجي ودمج بحيله 
(انتي دنيا وانه ليله )

خصرج كياشي اخاف بطولج اغرك 
خايف ابرد يمج ومتعود من المستحه اعرك 
شجابني الفيظج انه نكاطي كافي 
اني عايش على وشاله في قديم
 ويني اوين العوافي 
انتي تدنين على الماي بشراهه وانه احس ذيال ثوبي لاحه طين
انه صوت امي بكفاي وتجوتي صفصافه خظره 
ونتي بمتون المسير تنتجين 
( انه افز كبل الشمس وحلامي حنطه 
ونتي وي موت الشمس تتكحلين )

قصيدة مدح 35

يمتى يصير الفرح گمره بليالي الحزن
ويصير دمع المحب نجمه اعله شاطي الجفن

لانثر اغاني الكلب فوك البراري مزن
لاكبر ونوش السما شجره وحبيبي غصن

يوم على يوم انتظر 
صوته يصحيني 
ياخذني مثل الحلم ويلون سنيني
صبري تعدى الصبر بس دمعتي بعيني

ودعي حبيبي يجي يذكرني كلبه ويحن
يمتى يصير الفرح گمره بليالي الحزن

جمعت شوگي اله
 ضحكه وندى وقداح
انتظره يمتى يجي ...وهمي يصير افراح
واصير انا جناح اله 
وهوه اليه جناح

ونطير وي الهوى ...واحد لواحد يحن 

يمتى يصير الفرح گمره بليالي الحزن..

قصيدة مدح 36

امس من باگو اعيونك گلت غنو مواويلي 
امس من من شبگو  چفوفك 
تكسر سنبلي بچفي وعرفت ابكسرة الفلاح
 من ضاعت محاصيلي 

يا بذات يالتشبه  حنين الخذلو  امالة 
تعز روحي اسمع  بطاريك  وتكتر بالوشاله

چنت راويك ياعرج الصنوبر وانا المحليك 
ياطير العشگ غير الصدگ شنطيك
امس من حطو اعله اسمك سوالف لوم
 گمت ابچيك

غطيني بحلات النوم ياطيفي وحبيب النوم 
اخذني اوياك  يا ميزة عيوني ولذة المكتوم 
يانبعة ولع روحي  الگظاها اللوم 

خفت يالوصلتني امن الزعل للسوم 
لون تدري الضوه ابراس الضرير احلام ماخليتني اتمنه
ولو طبع الرجه ايتعب الگلوب البيض 
وخاف ابذلتي اتحنه 

ونشدك ليش كاروك الصور يمك غفه بحسرة دللولك 
گبل من حملي وتنخاك هسه احمولي وحمولك 
شوف شگد خذتنا بعيد يالنادر 
ولا حب  اشتهي اتخطاك غلطه بعثرة  الشاطر

قصيدة مدح 37

جرحي ازناد تفكه شما تسحكة ايثور
وكلبي اعيون طفله امن الهوه يدمعن

بجّيتك خجل عن لا تبيّن ذيب
خفتك تبتسم وانيابك يطلعن

امّنتك عمر وركَه اعله وجه الماي
اتمرجح صبر وامواجك يصفعن

عمري اوياك سبحه ابخيط مابي روح
خايف ينكطع واسنيني ينزعن

وانطيتك اسنيني وطعنتك والليل
رجعت طعنتك واسنيني ما رجعن

مدري اعظام ظهري العرينتهن بيض
مدري انياب سيفك بالضوه ايلمعن

لا تكسر اضلوعي الماسه من تنظام
اشما كثرن اكسور اضلوعهه ايشعن

بعد كوخ العمر ما عاد حدره اسنين
منجل والمبارد بالعمر شبعن

ايّس لا بعد بعيوني واهس ذيب
ولا غزلان طيفك بالجفن يرعن

صفنة يا عقل تحكم اعليهن توم
اجروحي اتشيّلن واجروحك ايرضعن

ولو ميزان وكتك من كبل خاواك
انته اتبوك وآنه اجفوفي ينكطعن

خنت شوفي وخذيت امتوني والجنحان
ومن ثكل الخيانه امتونك انخلعن

اليصعد مو شرط شايل ابمتنه اجناح
السهام ابلا جنح بس فوك يرتفعن 

شفت حملي رمح وامتوني من فلّين 

ذبلت غيرتك واسهامك الفزعن

وسامة خنجرك لمّت اجروحي اعليك
احجبهن صبر واكبالك ايفرعن

من طبع الجرح يرتاح حتى ايموت
واسيوفك جواعه وبالجرح رتعن

عفتني اعله الدرب طفله ابوجه محروك 
وكف بس الصبر بعيونهه اتمعّن

لا تتبعني احركك جفني ينزف نار
تبعنّي السنين وكبلك انلسعن

تسحك خاطري ويصعد لراسك ماي
ويذبلن احلامي البالهوه انزرعن

مثل ما جان طيفك بالجفن مطبوع
فوك اعظام ظهري اجدامك انطبعن

قصيدة مدح 38

بلدمعه انذكر جني المناديل
وبلضحكه انسي جني المشاكل 
اذه مابيك واهس للمراسيل ؟
عليمن تشكل اجناح الزواجل 
نتضرت هواي شردت التماثيل 
وهاي عيون حته انسان تاكل 

عدل تموت لازم دربك يميل 
  تعوج ياله تعيش المناجل 
انسه واغفه ساعه طيوفك تعيل
وفز فحطان احشم بلعواذل 

لا اول فراك ولا انا مهضوم
نتركت هواي زهكت المحاطات 
اضحك مابين انا ملجوم 
ضحكه ناس متروسه المصحات 
الكمر على ماي بس ينام بغيوم  
تتعب من تفكر بلمسافات 
امشي بغرفتي ولن طحت مصدوم
شفت واحدغريب على المشوفات 
بمتاع اليغامر خشب ملموم 
عشرتي وياك ماتكضي بسلامات 

قصيدة مدح 39

من أول لا هلا بمگفاي قاريــــك
وترى من الماكو ﭼـنت من أنتـﭼـي عليك 
ومثل ملگى العزيز الثارك وياه
عشت لا تنطرد لا ودّي الاگيك
عوز وطحت يم شماغ مذروب
يالموّسم الگصص ما ردت ابديك
وخليتك كحل بعيون ملدوغ
بالـ ما تنطبگ ﭼـا وين أخليك
ايـا مگفى الغروب اعلى المساجين
وﭼـزّت مستحة المديون طاريك
تصلي وحاسبك ويَّ اليصلون
يـسـﭼـين اغلبتني الـجِبلة الـ عليك
الطير اشما انطگ يحسبها بالريش
وحاذر مخلب الملـﭼـوم ياذيك
أمشرع خدّك و ما هوّنت بيه
وإلا حـﭼـي الطين أموالم عليك
زَلّة وما أخيط اردانگ النوب
وأمسح طرف سنّك خاطر أبريِك
ولا انا اليفز يا هلهولة الگوم
ليك وعرگ ينضح من يلاگيك
النياشين الغريبة تطيب وتروح
التهدك نياشين المنك وبيك
اليكابر ينحسب مكسور ﭼـذاب
ﭼـذب ما بيه ذنب لكن يحليك
بس شلفايدة من ابنادم يحوم
يبيع السما ويتبع ممشى رجليك
يصواب الحرامي الفشلة ينشاف
گوة اعليّة أضمك وأستعز بيك
الرسالة الحايلة ابين الصناديگ
كل ما ترجع وتقراها تـﭼـويك
ومثل لبسة الكشخة ..الـ بالمواعيد
أذبك بس ارد اردود وأشريـــــك
وأردلك وأفز يا هلهولة الگوم
وأسطر ذكرياتك وأنتـﭼـي عليك
ﭼذب وهوايّة غيرك وأنتـﭼـي عليك ..

قصيدة مدح 40

من عرفتك .. ﭼـنّي ما ﭼـنت أعرف أحد ..
الشيب الـ بلون الثلج خضّر سواد
ووجهيّ المطلگه الضحك ..باللحظة ورّد ..
من عرفتك .. بعد كل ذيـﭻ النوايب صرت مِسعد ..
راح الغراب الـ گبل يفتر عليّة
وصوت بلبل صرت اسمعه بروحي غرد  ..
من عرفتك .. 
گمت أحس كل الخلايا الماتت بروحي تتجدد ..
نزعت من اسنينها تلاثين روحي
وردّت لـ عشرينها بلا خجل تنعد
أنت مدري شلون أجيت .. بغفلة شو ﭼـنك قصيدة..
اتولّت الشاعر ﭼـوي وما رضت تبرد ..
وشرد أوصفك؟!! ..
وأحنه يبن الناس من دم ولحم بس أنتَ من ليلو وزمرد
أنت مرود للكحل بين الكحل والعين مرود ..
انت رحمة وفرّحت مسكين من أمة محمد ..
والله من تگلي أحبك .. 
أنا أحس بـ أعصابي من فوگ الجمر يا روحي تجمد ..
ولا تدليني بمكانك ..
هذا انت وداعتك وي النفس تنزل وتصعد ..


ومن مشيت الفرحة الـ بعيني طفت
ورَد على الخمسين عمري
والثلاثين الحذفهن ويّ عشرين الشباب اتوالفت ..
وگمت أشوف الضحكة دمعة ..
ودثرّت روحي بجمرها وما دفت
أتعارك بعيني الأرق ويّ النعاس
العركة خشنة الليل كله وما صفت
وجرحي صار بطول عمري ..
وصفنتي ويّ الليل ضدي اتحالفت ..
وبقت عيني مگابلتني گبالي وتباوع بعيني ..
وسلّمن شمسين لله وما غفت ..


ومن ذكرتك .. سكت كلشي
وعاند السكتة وبقى يصب الدمع 
من ذكرتك مدري شنهي الصار بيّه
رفس گلبي وراد يشلعلي الضلع
وصحت .. شو محد سمعني
وللعلم لمن ذكرتك ﭼـان ليل
وصوت دخان الجگاير ينسمع ..

قصيدة مدح 41

مدري شـﭼـان موضوعي بوكتها ..
ولو هيَّ بمواضيعي الوحيـــدة
ردت أكتب قصيدة وزاعلتها
لا وكتّج ولا وكت القصيــدة
زعلت بس اعرف مكابرتها ..
وإلّا شجابها بـدربي العنيدة
من نتلاگى وتطخ صاحبتها
وضحت مثل عنوان الجريدة
الحاصل طالت الغيبة شفتها
وتحققلي حلم ما جنت أريده
يمي عيونها وما فسرتها
تغوّش مثل الوجوه البعيدة
بقت شغلة نسيت وما گلتها
تريد تعوفني بحظها وبختها
انا رجلُ النهايات السعيدة
الطير شوكت ما يعجبني أصيده
عبالها حــﭼـايّة وگلتها
ترى ما هامنّي أحد يالبعيدة
جگارة و وين ماكملها أزتّها
على طاري ردت اكتب قصيدة
كملت القصيدة..وشگگتها ..
ومدري شـﭼـان موضوعي بوكتها ..

قصيدة مدح 42

من مريت حليت الـ "أعلوگة" التارسة الشباﭺ
وقريت أرسوم وجهك ذيج
لگيت المستحة بعينك
دفو ومن شافك العصفور ضم عشه بروازينك ..
يـ حُر شحصل الفلاح من طينك
تجي وك يا ضوة اتدنى ..
وفرهدني العمر گطرة اعلى راگ الغيم
وفك ازرار صدري وگول شتمنى
اتمنى ألم كل التراب الما رضى يجزيك
واضم حصّة لهذاك العيد ما حصل شذر منه
واجيك بزرگة الغرگان ..
أگلك عدنا حرحارة ولميض ازلوف
وانتَ اولاية الحنّة ..
تبطرتك ضوة الحواف لو شاف الگمر لونه
وتانيتك هوى العشاگ من يخلص بهلهولة ..
يمتبدي اعلى خلگي امتاع .. باصرني
الضوة شيريد غير بليل يتبدّة
باصرني .. النهر شيريد غير بگاع يتعدّة
وانتَ ولا عطش جابك
لا فزيت لا هب الهوة ببابك
لا رفت عيونك والعمر گشّة ..
ولا مديت شوفي عليك من جان الوكت رمشة
ولا سولفتك لعصفور من جان العشگ غبشة ..
ومن زمان اشتهى العاگول مايك
واشتهى البرحي نداك
وگالت النسمة هواك
وگالت النجمة ضواك
وسولف الصفصاف طولك وارتـﭼـى الفيّ بگفاك ..
من زمان وعيني تتدربى وراك ..
من زمان سولفن بيك العرايس
گالن الگمرة ويَّ خدّك طافيّة
يا ضواي الفزز عيون المدينة الغافية
ويا نهار الخط على دروب الشجر سـﭼـة اگرنفل
ورطّب اشفاف الظهاري الدافية ..
ويا ظلام الما اخذ عرض الحرامي
ويا نهار الما تمدد بالروازين الهزيلة
ولا تنيسل للرذيلة ..
من زمان الجِفن ضماك بشليلة ..

المدح هو أحد الفنون الشعرية التي تعنى بذكر الصفات الحسنة والأخلاق الفاضلة للأشخاص، وقد نشأ هذا الفن منذ القدم، وازدهر في العصر الجاهلي، حيث كان الشعراء يمدحون الملوك والزعماء والأمراء، ويذكرون فضائلهم وإنجازاتهم.

أنواع قصائد المدح

تتنوع قصائد المدح حسب موضوعها وشخصية الممدوح، ومن أشهر أنواعها:

  • قصائد مدح الرجال: وهي قصائد تعنى بمدح الرجال في شجاعتهم وكرمهم وحكمتهم، ومن أشهر شعراء المدح الرجال أبو الطيب المتنبي وعمر بن أبي ربيعة.
  • قصائد مدح النساء: وهي قصائد تعنى بمدح النساء في جمالهن وأخلاقهن وذكائهن، ومن أشهر شعراء المدح النساء امرؤ القيس وابن الرومي.
  • قصائد مدح الرسول: وهي قصائد تعنى بمدح الرسول صلى الله عليه وسلم، وبيان صفاته وأخلاقه، ومن أشهر شعراء المدح النبوي حسان بن ثابت وعبد الله بن العباس.

أمثلة على قصائد المدح

  • قصيدة مدح في رجل كفو:

ألا يا كفوًا في الزمانِ ذا كرمٍ وأخوًا ذا شرفٍ وذا مروءةٍ ألا يا ذا الجودِ والسخاءِ والشمائلِ ألا يا ذا الرأيِ والحكمةِ والعقلِ ألا يا ذا الخلقِ الحسنِ والسيرةِ ألا يا ذا المجدِ والسيادةِ والسلطانِ ألا يا ذا الفخرِ والعزِ والرفعةِ ألا يا ذا الكرمِ والسخاءِ والجودِ

  • شعر مدح في شخص غالي:

يا غالي يا صاحب القلب الطيب يا من عرفتُه منذ الصغر أنتَ صديقي وأخي وحبيبي أنتَ كل شيءٍ في حياتي أحبكَ أكثر من نفسي أحبكَ أكثر من الحياة وسأظلُ أحبكَ إلى الأبد

  • قصائد مدح الرجال:

ألا يا ذا الجودِ والكرمِ والسخاءِ ألا يا ذا الشجاعةِ والجرأةِ ألا يا ذا الشرفِ والكرامةِ ألا يا ذا الأخلاقِ الفاضلةِ أنتَ مثالٌ للرجلِ العربي أنتَ رمزٌ للعزِ والشموخ أنتَ فخرٌ لنا أيها الرجل

  • شعر مدح قصير:

يا ذا الأخلاقِ الفاضلةِ يا ذا الكرمِ والسخاءِ أنتَ مثالٌ للرجلِ العربي أنتَ فخرٌ لنا أيها الرجل

  • قصائد مدح بنات:

يا زينَ الحسنِ والجمالِ يا ذا الأخلاقِ الفاضلةِ أنتِ رمزٌ للمرأةِ العربية أنتِ فخرٌ لنا أيتها البنت

  • قصيدة مدح قويه:

أنا رجلٌ قويٌ وشجاعٌ أنا رجلٌ مقدامٌ لا يهابُ أحدًا أنا رجلٌ صاحبُ كرامةٍ وشرفٍ أنا رجلٌ لا يذلُ ولا يهانُ

  • قصائد مدح الرسول:

محمدٌ رسولُ الله أشرفُ خلقِ الله جاءَنا بالقرآنِ ورفعَ شأنَ الإنسانِ صلى الله عليه وسلم وعلى آله وصحبه وسلم

  • ابيات شعر مدح وفخر بدوي:

أنا ابنُ الصحراءِ أنا فارسُ الفرسانِ أنا صاحبُ الكرمِ والجودِ أنا فخرُ العربِ والعجمِ

قد يهمك أيضا: شعر غزل عراقي قصير أبيات شعر عراقية روعة 2023

إن قصائد المدح من أجمل الفنون الشعرية، فهي تعبر عن مشاعر الحب والتقدير والاحترام تجاه الأشخاص الذين نحبهم ونقدرهم.

قد يعجبك ايضا